නින්ද නේන රාත්‍රියේ...

කොහොම පටන් ගන්නද කියලා හිතාගන්න බැරි උනත් කොහොමහරි පටන් ගන්න ඕනෙ නිසා මගේ විස්තරේ කියලම පටන් ගන්නම්.
මතක ඇති කාලෙකින් මම නම් රෑට නිදාගෙන නෑ.. ඇති වැඩකටම නෙමේ කිසිම හේතුවක් නැතුවත්, ඇත්තම කිව්වොත් මට රෑට නින්ද යන්නේ නෑ.. මට නිශාචරයා කියලා card 1 ක් දැම්මේ ඇත්තටම මගේ අම්මා, ඒ ඉතින් සෑහෙන කාලෙකට කලින්. ඒ කාලෙ නිදි මරන්න එක එක හේතු තිබුනා. පොත් කියවන පිස්සුව මට අකුරු දැනගත්ත දවසේ ඉඳලම තිබුන එකක් ඒකට පස්සෙ කාලෙක එකතු උනා Computer games, Movies, Parties... ඒ මදිවට දැන් මොන ලෝකෙ ඉන්නවද කියලවත් දන්නෙ නැති කෙල්ලො ගැන හිත හිත නිදි මරපු කාලෙකුත් තිබුනා. මොනවා උනත් A/L කාලෙ නම් සනීපෙට නිදාගත්තා මොකද පාඩම් කරන්න ඔනෙ කියලා හිතපු ගමන් හෙණ ගැහුවා වගේ නින්ද යනවනේ.. :-) 

ලංකාවෙ ගතකරපු ඒ කාලේ එක අතකින් සුන්දරයි... ඒ ජීවිතේ කරගහගෙන කැන්ගරු රටට ගොඩබැහැලා අසීමිත නිදහසක් එක්ක අසීමිත දුක් කරදර ජීවිතේ වටේ පටලවාගත්ත අපිට ජීවිතේ විඳින්න වෙලාවක් නෑ.. රෑ තිස්සෙ නිදිමරලා පුරුදු නිසා රෑට වැඩ කරන එක නම් අවුලක්ම නෑ.. අවුලකට තියෙන්නේ වැඩ නෑ කියලා ආසාවකටවත් රෑකට නිදාගන්න බැරි එක. 

මේ නිදහස වැඩිකමටම බේබදුකමත් අම්බානෙකට වැඩියි ඇයි ඉතින් රෑට ගෙදර යන්න ඔනෙ කියලවත් යද්දි කෙලින් යන්න ඔනෙ කියලවත් දෙයක් තියෙන එකක්යැ... මේ ජීවිතේ මෙහෙම ගිහින් කොහේ නතරවෙයිද කියලා නම් මම දන්නේ නෑ හැබැයි මගේ ජාතකේ කියවන එකනම් දැන් ඇති වෙලා කියලා මම හොඳටම දන්නවා... :-)

කොහොම උනත් මං වගේ නින්ද යන්නෙ නැති තවත් කවුරු කවුරු හරි ඇති කියලා හිතුන නිසයි මේ වගේ BLOG 1ක් පටන් ගන්න හිතුනේ. නින්ද යන්නෙත් නැති එකේ කරන්න දේකුත් තියෙන්න එපැයි..

BLOG 1ක් පටන් ගන්න කාලෙක ඉඳන් හිතාගෙන හිටියත් ඒක කරන්න ලබුනෙම නෑ. අන්තිමට ඒක කරන්නම ඕනෙ කියලා Kick 1ක් ආවේ අහම්බෙන් වගේ දැකපු සිංහල BLOG 1ක් නිසා.

කොහොම කොහොම හරි යන්තම් ඔන්න වැඩේ පටන් ගත්තා. ලියන්න පටන් ගත්තම ඒකත් නවතින පාටක් නෑ වගේ. දැන් නම් මේක ඇදෙනවා වැඩියි කියලා මටම තේරෙන නිසා මම මෙතනින් අදට නවතින්නම්. මට හිතෙනවා මේ යන විදියට මමත් මොනවා මොනවා හරි දිගටම ලියයි කියලා. ඉතින් එහෙම උනොත් අපි අයෙත් මේ සිහින අඩවියෙදිම මුණ ගැහෙයි.. එතකන් හැමොටම සැපවත් නින්දක් පතන මම.... නිශාචරයා...